Vuçiç: Do t’i drejtohemi KFOR-it me kërkesë për dërgimin e trupave serbe në Kosovë

Presidenti i Serbisë, Aleksandar Vuçiç tha se do t’i drejtohet KFOR-it me kërkesë për lejimin e dërgimit të trupave ushtarake dhe policore serbe në Kosovë.

Gjatë një konference për mediat në Beograd, Vuçiç bëri të ditur se vendimi i qeverisë do të merret të hënën ose të martën, shkruan Euronews Serbia.

“Ne u dakordësuam sot për tekstin që t’i dërgojmë një kërkesë komandantit të KFOR-it, në përputhje me Rezolutën 1244, për të siguruar dislokimin e pjesëtarëve të ushtrisë dhe policisë serbe në territorin e Kosovës dhe vendimi i qeverisë për këtë çështje do të merret të hënën ose të martën”, theksoi ai.

Sipas tij, KFOR do të gjejë arsye të panumërta për të dëshmuar se janë në kontroll të situatës. Por, Vuçiç paralajmëroi se Serbia do të kërkojë mënyra të reja ligjore për të arritur qëllimin e saj.

Kreu i shtetit serb pretendoi se sipas Rezolutës 1244 të Këshillit të Sigurimit të Kombeve të bashkuara, Serbia ka të drejtë të kthejë forcat e saj në Kosovë.

LEXONI GJITHASHTU

• Tensione gjatë natës në veri, shpërthime dhe të shtëna armësh në disa lokacione
• Tensione në veri, Policia e Kosovës sulmohet me armë zjarri në afërsi të Ujmanit
• Ministri i Jashtëm i Italisë bisedë me Kurtin dhe Vuçiç, çfarë paralajmëron