Presidenti i Serbisë, Aleksandër Vuçiç, ka marrë në mbrojtje nënkryetarin e listës serbe Milan Radoiçiç, duke theksuar se ai është luftëtar për liri.

Vuçiç mohoi që Radoiçiç të jetë plagosur ndërsa konfirmoi se nënkryetari i Listës Serbe, gjendet në Serbi dhe do të merret në pyetje nga organet serbe.

“Ai definitivisht do t’i përgjigjet ftesës nga autoritetet kompetente në Serbi. Republika e Serbisë dhe autoritetet kompetente do të bëjnë punën e tyre”, tha ai.

Në një intervistë për Radio Televizionin e Serbisë, Vuçiç tha se “Millan Radoiçiç kurrë nuk është fshehur, kurrë nuk është turpëruar për rolin e tij… në diçka që ka ndodhur që nuk është në të mirë të Serbisë apo që nuk i ka sjell dobi Serbisë”, tha ai.

“Ai e konsideron veten luftëtar të lirisë, ai kurrë nuk ka hequr dorë nga shokët e tij dhe kurrë nuk do ta bëjë, por ka gjëra dhe pyetje që ai duhet t’iu përgjigjet”, tha presidenti serb.

Në lidhje me videon e publikuar nga Ministri i Brendshëm të Kosovës Xhelal Sveçla, ku Radoiçiç shihet në drejtimin e terroristëve që sulmuan policinë e Kosovës, Vuçiç tha se kjo do të përcaktohet nga autoritetet kompetente.

Kur u pyet për qëllimin e grupit të armatosur që sulmoi policinë e Kosovës, ai shtoi: “Si mund ta di këtë, por jam i sigurt se ata shkuan të ruanin shtëpitë e tyre dhe u përgatitën për sulme në të ardhmen”.

Vuçiç tha po ashtu se “nuk mund të them” se sa sulmues ishin, pasi ka “vlerësime të ndryshme”. Autoritetet në Kosovë kanë thënë se grupi i armatosur përbëhej prej rreth 30 personash.

Vuçiç tha se se pjesëtarët e grupit të armatosur që sulmoi Policinë e Kosovës më 24 shtator në Banjskë të Zveçanit, “nuk janë terroristë”.

“Për mua si president i Serbisë ata njerëz nuk mund të jenë terroristë. A mund ta justifikojë vrasjen e një polici… nuk ka asnjë justifikim dhe për këtë autoritetet shtetërore do të ndërmarrin hapa”, tha ai.

Vuçiç nënvizoi se tani ka më shumë informacione sesa në ditën kur ndodhi sulmi, kur iu drejtua publikut në Serbi.

“Ne do të kërkojmë që të na i tregojnë pamjet me dron se si u vra polici. Nuk ishte një vrasje e planifikuar”, tha ai.

Presidenti serb sërish mohoi se shteti i tij qëndron prapa sulmit në Banjskë.

Presidenti serb po ashtu u pyet nëse kishte informacione për sulmin dhe ai u përgjigj:

“Kam pasur informacione që një vit se njerëzit po përgatiteshin për rezistencë dhe ata nuk e kanë fshehur këtë gjë”. Ai shtoi se përfaqësuesit e serbëve nga veriu i Kosovës ishin kundër heqjes së barrikadave që u vendosën në disa raste më herët kur kishte kriza në raportet mes Kosovës dhe Serbisë.

Lideri serb tha se kur ndodhi sulmi, serbët ishin duke vendosur barrikada “e jo kurthe”.

Ai tha se një polic i Kosovës “u plagos nga eksplozivët që u përdorën për të ngritur barrikadat” dhe pas kësaj kishte të shtëna armësh.

Sipas tij, më pas Policia e Kosovës nisi aksionin me synimin që të “likuidonte të gjithë serbët”. Ai pretendoi se dy sulmues u vranë pasi u dorëzuan.

Ai mohoi se një nga sulmuesit e vrarë ishte pjesë e sigurimit të drejtorit aktual të inteligjencës Aleksandër Vulin.

LEXONI GJITHASHTU:

• Rama: Qëndrimi i Shqipërisë i qartë, BE të dënojë me zë të lartë vrasjen e policit
• Rama: Dialogu Kosovë-Serbi të ngrihet në nivelin e një konference ndërkombëtare