“Vuçiçi si Millosheviçi i ri”, Osmani: Kosova do ta mbrojë paqen

Presidentja e Kosovës, Vjosa Osmani, ka thënë se thirrjet e presidentit të Serbisë, Aleksandar Vuçiç, për luftë janë një jehonë e rrezikshme e kapitujve më të errët të historisë së fundit.

Në një postim të Presidencës së Kosovës në platformën “X”, thuhet se Vuçiçi po tregon se nuk ka zgjedhur rrugën e pajtimit.

“Thirrjet e pamatura të Vuçiçit për luftë janë një jehonë e rrezikshme e kapitujve më të errët të historisë së kohëve të fundit. Pavarësisht viteve të angazhimit të palodhshëm amerikanë dhe evropianë për të hapur rrugën drejt paqes së qëndrueshme, Vuçiçi po i tregon botës se nuk ka zgjedhur rrugën e pajtimit. Në vend që të kthejë faqen, Vuçiçi dhe regjimi i tij po flirtojnë përsëri me të njëjtat fantazi shkatërruese që dikur shkatërruan jetë të pafajshme të panumërta. E kemi parë këtë edhe më parë”, thuhet në reagimin e Presidencës së Kosovës.

Osmani thotë se Kosova ka zgjedhur paqen dhe se do ta mbrojë atë me çdo kusht.

“Lufta nuk është një mjet lidershipi. Është streha e fundit e udhëheqësve që kanë humbur legjitimitetin, që nuk mund të frymëzojnë me vizion dhe nuk shohin rrugën para përveçse përmes shkatërrimit. Në anën tjetër, Kosova ka zgjedhur paqen. Paqen, të cilën ne do ta mbrojmë me çdo kusht”. Presidenti i Serbisë, Aleksandar Vuçiç, ka thënë të premten se “të gjithë po përgatiten për luftë” dhe se Kosova po “përpiqet ta përdorë këtë kohë para luftës” për t’i bindur shumicën e shteteve evropiane dhe vendet e NATO-s t’ia mbajnë anën asaj.

Ajo ngre një paralele mes Vuçiçit dhe Sllobodan Millosheviçit.

“Në vitet ’90, Sllobodan Millosheviç zgjodhi luftën gjenocidale si instrumentin e tij të fundit të dëshpëruar të pushtetit. Ai lëshoi dhunë çnjerëzore në Kroaci, në Bosnjë dhe Hercegovinë, dhe në fund në Kosovë – të gjitha të dokumentuara me kujdes që bota t’i shihte. Përmes makinës së tij të propagandës, me Vuçiçin si shefin e tij të propagandës, ai ndezi urrejtje që çoi në vrasje sistematike, varre masive, shkatërrime dhe izolim më të thellë të Serbisë. Pushteti i tij përfundoi në turp: i rrëzuar nga populli, i gjykuar si kriminel lufte dhe i kujtuar si njeriu që çoi kombin e tij në rrënim dhe si kasap i Ballkanit. Tash, Vuçiçi duket se beson se mund të ringjallë të njëjtën formulë helmuese: nxitjen e konfliktit, bixhozin me jetë, dhe bastin se gjakderdhja do ta ruajë sundimin e tij. Por, historia është e qartë dhe e pamëshirshme: Millosheviç dështoi – kështu do t’i ndodhë edhe Vuçiçit”, thuhet në reagim.

LEXONI GJITHASHTU:

• Vuçiç: Të gjithë po përgatiten për luftë! Kosova po përpiqet ta përdorë këtë kohë
• VIDEO/ Vuçiç dhe Osmani “bashkohen” në tapetin e kuq të Kopenhagenit