Zbardhen tre raste vjedhjesh në Sarandë, arrestohen dy persona në flagrancë

Policia e Sarandës ka zbardhur tre raste vjedhjesh të portofolave dhe celularëve, ndërsa ka arrestuar në flagrancë dy shtetas të dyshuar si bashkëpunëtorë në këto ngjarje, të cilët rezultojnë me precedent penal për këtë fushë.

Shërbimet e Komisariatit të Policisë Sarandë organizuan dhe finalizuan operacionin e koduar “Pick Pocket” ku si rezultat, u bë i mundur identifikimi dhe arrestimi i dy shtetasve të dyshuar për vjedhje:

A. P., 58 vjeç dhe E. S., 45 vjeç, të dy banues në Fier. Këta shtetas janë kapur dhe arrestuar në flagrancë, pasi dyshohet se më datë 25.04.2026 i kanë vjedhur celularin shtetasit S. P., banues në Sarandë. Gjithashtu, nga hetimet dyshohet se ata kanë vjedhur edhe portofola me shuma parash dy shtetasve të tjerë, në datat 19.04.2026 dhe 28.01.2026, në lagjet nr. 3 dhe nr. 4, Sarandë.

Vijojnë hetimet për zbardhjen e vjedhjeve të tjera që mund të kenë kryer këta shtetas.

Materialet procedurale i janë referuar Prokurorisë për veprime të mëtejshme, për veprën penale “Vjedhja”, kryer në bashkëpunim.