Euronews Albania ka mundur të sigurojë raportin e plotë të Avokatit të Popullit në lidhje me vdekjen e 31-vjeçarit Lear Kurti, i cili ndërroi jetë pas shoqërimit në polici më datë 19 tetor 2022.

Në raport theksohet se ngjarja mund të parandalohej nëse punonjësit e policisë do të kishin kryer veprimet e duhura.

Sipas Avokatit të Popullit, shoqërimi i të riut ka qenë në kundërshtim me dispozitat ligjore, pasi nuk mund të bëhet shoqërimi i një personi vetëm duke u mbështetur në dyshime të pa arsyeshme.

“Duke mbajtur në konsideratë natyrën e çështjes, në raste të tilla shërbimet e policisë, mund ta parandalonin këtë ngjarje, në kushtet e veprimeve apo mosveprimeve që përfaqësuesit e rendit publik kishin si detyrim të kryenin. Nisur nga këto deklarime si dhe duke iu referuar nenit 109 të ligjit të sipërcituar, rezulton se punonjësit e policisë kanë vepruar në kundërshtim me dispozitën e mësipërme, sepse nuk mund të bëhet shoqërimi i një personi duke u mbështetur vetëm në dyshime të pa arsyeshme. Sipas dispozitës së cituar, dyshimet duhet të jenë të arsyeshme, për kryerjen e një krimi, për të parandaluar kryerjen e një vepre penale, ose për identifikimin e personit ndaj të cilit zhvillohen hetime (pikat ‘c’ dhe ‘ç’ parashikojnë se në rastin konkret, nuk ndodhemi as para shoqërimit, ndalimit dhe as para arrestimit në flagrancë, që parashikon Kodi i Procedurës Penale (KPP). Në këto rrethana, punonjësit e Policisë kanë vepruar në kundërshtim me nenin 27 të Kushtetutës dhe nenit 5 të Konventës Europiane të të Drejtave të Njeriut (KEDNJ), që parashikojnë rastet kur mund të kufizohet liria e personit.

Gjithashtu raporti thekson se mungesa e procedurave dhe dukumentimit të shoqërimit në komisariat të të riut përbën shkelje të rëndë disiplinore.

“Procedurat e evidentimit të veprimeve që janë kryer me të shoqëruarin kryhet nga punonjësi i policisë që ka punuar dhe sqaruar çështjen, ndërsa hedhja e të dhënave në regjistër dhe në sistemin elektronik të të dhënave kryhen nga punonjësi i policisë të shërbimit të informacionit në njësinë policore. Mos zbatimi i kësaj kërkese nga personat përgjegjës për dokumentimin e aktit të shoqërimit, përbën shkelje të rëndë disiplinore”, thuhet në raport.

Avokati i Popullit ngre shqetësimin për mos vënien në dispozicion të materialeve filmike të shoqërimit të Lear Kurtit. Sipas raportit pamjet janë siguruar nga materialet e publikuara në emisionin “Review”, në Euronews Albania.

“Gjithashtu në mungesë të pamjeve filmike, kemi administruar pamjet të publikuara në media https://www.youtube.com/ëatch?v=oCXcaHZog0o, Media “Euronews Albania” në të cilën shfaqen pamjet e para të momentit e kapjes së personit L.K dhe neutralizimi i tij pas ndjekjes nga policia për afërsisht 200 metra nga momenti i parë i komunikimit me të. Në këto pamje qartazi duket gjendja e rënduar shëndetësore e shtetasit L.K i cili është i ulur në tokë dhe i pafuqishëm për tu ngritur si dhe punonjësit e policisë që tentojnë ta shoqërojnë. Koha e qëndrimit në këto kushte deri në momentin e futjes së tij në makinën e policisë është afërsisht 7 minuta. Lidhur me këtë çështje, Institucioni i Avokati të Popullit ka mbajtur një qëndrim në media duke pasqyruar qartazi problematikat e evidentuara përgjatë shoqërimit të shtetasit L.K”, përfundon raporti.