Zelenski mesazh në Parlamentin italian: Objektivi i Rusisë është Evropa

Presidenti Volodimir Zelenski u mirëprit me duartrokitje në parlamentin italian. Në një video-mesazh, Zelenski u shpreh se vendi i tij është në prag të mbijetesës.

Ai bëri thirrje për më shumë sanksione dhe presion ndaj Rusisë për të ndalur luftën. Sipas tij, qëllimi përfundimtar i agresionit është të shkatërrojë vlerat e evropianëve.

“Kjo është një luftë që Rusia e ka përgatitur për një kohë të gjatë. Ky person e ka përgatitur për një kohë të gjatë, për dekada. Duke fituar jashtëzakonisht shumë falë eksporteve të naftës dhe gazit, transferimi i këtyre parave shërben për përgatitjen e luftës dhe jo vetëm kundër Ukrainës, por objektivi i saj është Evropa… Ukraina është porta e Evropës për trupat ruse. Ata kanë hyrë, por barbaria nuk duhet të kalojë”, u shpreh Zelenski.

Kryeministri italian Mario Draghi tha se vendi i tij dëshiron të shohë Ukrainën në BE dhe se duhet t’i ofrojë ndihmë ushtarake për të ndalur masakrat. Para se t’i drejtohej Parlamentit italian, Zelenski bisedoi  në telefon edhe me Papa Françeskun dhe kërkoi që Vatikani të ndërmjetësojë për të arritur paqen.

LEXONI GJITHASHTU:

• Zelenski thirrje për bisedime me Putin, Turqia ndërmjetëse e palëve
• Gati për negociata me Putinin, thotë Zelenski