Zelensky: Guximi Rusisë, sinjal i qartë se sanksionet nuk janë të mjaftueshme

Presidenti i Ukrainës Volodymir Zelensky ka përsëritur mbrëmjen e së dielës kërkesën për masa më të ashpra kundër Rusisë.

“Guximi i agresorit është një sinjal i qartë për Perëndimin se sanksionet kundër Rusisë nuk janë të mjaftueshme”, deklaroi Zelensky.

Përmes një video-mesazhi publikuar në rrjete sociale, presidenti i Ukrainës paralajmëroi se Rusia ka në plan një fushatë bombardimesh të vazhdueshme mbi gjithë territorin gjatë ditës së hënë.

Zelensky kritikoi liderët e Perëndimit se po qëndrojnë të heshtur.

“Nuk kam dëgjuar reagim ndaj këtij njoftimi nga asnjë lider botëror, nga asnjë politikan perëndimor. Mendoni për ndjenjën e mosndëshkimit që kanë pushtuesit: Ata po shpallin mizoritë që kanë planifikuar”, tha ai.

“Sonte është e Diela e Faljeve. Por ne nuk do t’i falim ata që bombarduan mbi shtëpitë. Ne nuk do të falim ata që qëlluan mbi civilë të paarmatosur. Dhe Zoti nuk do të falë. Dhe në vend të faljes, do të ketë një Ditë Gjykimi”, tha ai.

Ai ka shprehur mirënjohjen ndaj qytetarëve që kanë bërë rezistencë e po ashtu autoriteteve lokale të cilëve iu tha se “kanë shkëlqyer në mbrojtjen e komuniteteve të tyre”.

Zelensky gjithashtu dekoroi me çmimin e nderit “Qytet Heroik” disa qytete për rezistencën e tyre 11-ditore, përkatësisht  Kharkivi, Chernihivi, Mariupoli, Khersoni, Gostomeli dhe Volnovakha.

LEXONI GJITHASHTU:

• Përditësime LIVE 6 mars: Rusia shënjestron centralin e tretë bërthamor