Zelensky i cilëson produktive bisedimet në Londër: Na duhen 15 mld dollarë armë

Presidenti ukrainas Volodymyr Zelensky i përshkroi bisedimet e tij në Londër me udhëheqësit e Britanisë, Gjermanisë dhe Francës si “produktive” sot. Ai theksoi se propozimet për paqe po finalizohen dhe do t’u komunikohen Shteteve të Bashkuara nesër, të martën. Plani i propozuar për t’i dhënë fund luftës në Ukrainë përfshin 20 pika, tha Zelensky, pa një zgjidhje kompromisi për çështjet territoriale.

“Unë besoj se plani do të jetë gati nesër, diku në mbrëmje. Mendoj se do ta shqyrtojmë përsëri dhe do t’ia përcjellim Shteteve të Bashkuara”, tha Zelenskyy, i cili pas Londrës udhëtoi për në Bruksel për bisedime me udhëheqjen e NATO-s dhe BE-së. Nesër, të martën, presidenti ukrainas do të vizitojë Italinë për konsultime me kryeministren Giorgia Meloni.

Ukraina ka mungesë prej 800 milionë dollarësh për blerjen e armëve amerikane që kishte planifikuar t’i blinte këtë vit me ndihmën e aleatëve të saj evropianë, tha Zelensky.

Ai përsëriti se vitin e ardhshëm, vendi i tij do të ketë nevojë për ndihmë ushtarake të vlerësuar në rreth 15 miliardë dollarë, sipas iniciativës PURL (Lista e Kërkesave të Prioriteteve për Ukrainën) që i lejon Kievit të blejë sisteme armësh amerikane të financuara nga evropianët.

Së fundmi, ai konfirmoi raportet për dronë të dyshimtë që i afroheshin aeroplanit që po e transportonte atë në Dublin javën e kaluar. “Një hetim do të kryhet… Në të vërtetë, kishte dronë”, u tha Zelensky gazetarëve. Mediat irlandeze raportuan të enjten se një anije luftarake vuri re deri në pesë dronë që shkelnin zonën e ndalim-fluturimit duke u drejtuar drejt aeroplanit që transportonte Zelenskyn në Dublin.

LEXONI GJITHASHTU:

• Trump i zhgënjyer nga Zelensky: Nuk është gati për paqen
• Zelensky: Ende nuk ka një marrëveshje për Ukrainën lindore në bisedimet me SHBA-në