Zelenskyy: Nëse më ftojnë do të bashkohem me samitin Trump-Putin në Hungari

Presidenti ukrainas, Volodymyr Zelenskyy tha të hënën se do të ishte gati t’i bashkohej homologut të tij amerikan, Donald Trump dhe Vladimir Putinit në samitin e tyre në Hungari nëse do të ftohet. Trump dhe Putin pritet të takohen në kryeqytetin hungarez, ndoshta brenda pak javësh.

Ky takim do të zhvillohet ndërsa udhëheqësi amerikan vazhdon të përpiqet të ndërmjetësojë një marrëveshje paqeje për t’i dhënë fund luftës trevjeçare e gjysmë. Zelenskyy u tha gazetarëve se nëse e ftojnë në Budapest do të marrë pjesë.

“Nëse më ftojnë në Budapest – nëse është një ftesë në një format ku takohemi si tre ose, siç quhet, diplomaci e shpejtë, Presidenti Trump takohet me Putinin dhe Presidenti Trump takohet me mua – atëherë në një format apo në një tjetër, ne do të biem dakord”, tha ai.

Presidenti ukrainas kritikoi gjithashtu zgjedhjen e Hungarisë, e cila ka një marrëdhënie të ashpër me Kievin dhe shihet si anëtari i Bashkimit Evropian më simpatizant ndaj Kremlinit.

“Nuk besoj se një kryeministër që bllokon Ukrainën kudo mund të bëjë diçka pozitive për ukrainasit ose të ofrojë një kontribut të ekuilibruar”, tha Zelenskyy, duke iu referuar udhëheqësit hungarez, Viktor Orban.

LEXONI GJITHASHTU:

• Lufta në Ukrainë/ Rusia mobilizon më shumë rezervistë, nga 2 milonë që janë aktiv
• Zelenskyy: Do të nominoj Trump për Çmimin e Paqes nëse arrin armëpushim në Ukrainë