Kur na ndan edhe 1 muaj nga përfundimi i këtij sesioni parlamentar, Partia Socialiste ka kërkuar bashkëpunimin e Partisë Demokratike për të zgjedhur Avokatin e ri të Popullit. Ftesa u bë nga Taulant Balla, i cili kërkoi nga Gazment Bardhi që të ulen në tryezë për zgjedhjen e Avokatit të ri të Popullit.
Mazhoranca ka ftuar në tryezë opozitën për zgjedhjen e Avokatit të ri të Popullit. Apeli u bë nga foltorja e Kuvendit, ku kreu i Grupit Parlamentar Socialist Taulant Balla bëri thirrje për përmbylljen e këtij procesi deri në fund të korrikut, kur mbyllet edhe ky sesion parlamentar.
“I propozoj kryetarit të grupit të PD-së, Bardhit, të ulemi gjatë javës së ardhshme bashkë me drejtuesit e Komisionit të Ligjeve në mënyrë që të bëjmë një verifikim të kandidaturave që kemi përballë para nesh, që të shkojmë drejt një grupi që ka 3-4 kandidatura, që mund të jenë kandidaturat që marrin më shumë konsensus.”
Në garë për postin e Avokatit të Popullit janë 15 kandidatë, por deri tani vetëm 3 prej tyre kanë marrë mbështetjen me firma të deputetëve, në mënyrë që të votohen në seancë plenare.
Mazhoranca nuk mund ta zgjedhë e vetme Avokatin e Popullit, pasi i duhen 84 vota të cilat nuk i ka, ndaj i duhet bashkëpunim me opozitën. Prej një viti, Avokatja e Popullit është jashtë mandatit pasi parlamenti dështoi, në dhjetor të vitit të kaluar, të zgjidhte Avokatin e ri të Popullit.
LEXONI GJITHASHTU:
- Avokati i Popullit zgjidhet brenda 20 korrikut, emrat e propozuar nga opozita
- Zgjedhja e Avokatit të Popullit, Balla ftesë Bardhit të ulen në bisedime