Zgjedhje për herë të parë pa OSBE-në, Euronews Albania ndjek procesin në Mitrovicën e Jugut dhe Veriut

Për herë të parë procesi i votimit në pjesën veriore të Kosovës, po organizohet dhe menaxhohet nga KQZ-ja.

Ky institucion nuk ka ftuar (OSBE) misionin e Organizatës për Siguri dhe Bashkëpunim në Evropë që të ndihmojë në këtë proces, siç ka ndodhur në të kaluarën.

Grupi i xhirimit i Euronews Albania, gazetari Jeton Musliu dhe operatori Fatmir Tahiri panë nga afër ecurinë e procesit në Mitrovicen e Jugut dhe atë të Veriut.

Në dy anët e Urës së Ibrit qëndron policia edhe pse situata ishte e qetë.

Pasi kalon urën sheh se serbët shkojnë të votojnë në mënyrë të organizuar.

Kur i pyet serbët e Kosovës se çfarë presin nga qeveria e re, disa nuk duan të përgjigjen, të tjerë thonë se presin paqe e një jetë më të mirë.

“Po kam votuar, sigurisht”, u shpreh një qytetare.

“Pres nga qeveria e re diçka për më mirë”, tha një tjetër.

“Nga qeveria e re pres të punojë më mirë për të gjithë qytetarët”, tha një tjetër qytetar.

“Pres që të ketë paqe e të jetë më mirë për të gjithë që jetojnë këtu”, pohoi nje qytetar.

“Votova dhe nuk pres diçka, thjesht votova dhe urime zgjedhjet”, pohoi një qytetare.

Ekipi i Euronews Albania ka parë se në Komunën e Veriut të Mitrovicës nuk janë lejuar të votojnë qytetarë me dokumente të Serbisë, pasi me vendim të KQZ votohet vetem me dokumentet e identifikimit të Kosovës.