Zgjedhjet e pjesshme në Himarë, Begaj thërret në Presidencë Celibashin

Presidenti i Republikës, Bajram Begaj, ka thirrur në një takim kreun e KQZ-së, Ilirjan Celibashin. Ky takim vjen menjëherë pasi Komisioni Qendror i Zgjedhjeve i hoqi mandatin Fredi Belerit si kryetar i zgjedhur i Bashkisë Himarë.

Më herët, Këshilli i Ministrave iu drejtua me një shkresë kreut të shtetit, të cilit i kërkoi të caktojë datën për mbajtjen e zgjedhjeve të pjesshme në Bashkinë Himarë.

Në shkresën që mban firmën e Sekretarit të Përgjithshëm i Këshillit të Ministrave, Ëngjëll Agaçi, i kërkohet presidentit të vendit që të shpallë datën e zgjedhjeve të pjesshme në Himarë.

Presidenti i vendit në bazë të ligjit, ka 48-orë kohë për t’u shprehur në lidhje me caktimin e datës së zgjedhjeve, të cilat mund të mbahen jo më herët se 30 ditë nga sot, e jo më vonë se 45 ditë.

4,11 dhe 18 gusht janë datat e mundshme si të vetmet të diela brenda afatit ligjor, kur pritet të mbahen zgjedhjet në Himarë.

LEXONI GJITHASHTU:

• Qeveria shkresë Presidencës, kërkon të shpallen zgjedhje në Himarë. Datat e mundshme
• Mandati i Belerit dhe zgjedhjet e reja në Himarë, KQZ mblidhet të enjten