Zgjerimi i BE në 2030? Komisioni Evropian komenton propozimin e Charles Michel

Komisioni Evropian ka komentuar propozimin e Presidentit të Këshillit Evropian, Charles Michel i cili deklaroi që viti 2030 të caktohet si afat deri kur vendet tashmë kandidate dhe Bashkimi Evropian të jenë të gatshme për zgjerim.

Në një konferencë për mediat në Bruksel këtë të martë, zëdhënësja e Komisionit Evropian, Dana Spinat tha se Komisioni Evropian nuk është i përqendruar në afate kohore në procesin e zgjerimit të Bashkimit Evropian.

“Nuk jemi të fokusuar në afate kohore. Kemi instrumente për t’i ndihmuar kandidatët për t’u afruar me BE-në edhe para se të bëhen anëtare. Komisioni ka dëshmuar se është i përkushtuar që ta mbajë procesin e zgjerimit si prioritet”, tha zëdhënësja e Komisionit Evropian.

Spinat thotë se vendet kandidate duhet të jenë gati për anëtarësim në familjen europiane.

“Gjithmonë kemi thënë se zgjerimi është prioritet dhe kandidatët duhet të anëtarësohen kur të jenë gati. Kemi punuar për së afërmi me kandidatët për t’i ndihmuar që ata të kryejnë reformat”, u shpreh Spinat.

Zëdhënësja e Komisionit Evropian paralajmëroi se liderët e Bashkimit Evropian do të diskutojnë për zgjerimin në samitin e Granadës në Spanjë, më 5 tetor.

LEXONI GJITHASHTU:

• Charles Michel: Deri më 2030 BE dhe shtetet kandidate të jenë gati për zgjerim
• Rama në Forumin e Bledit: Nuk besoj se deri në 2030 do jemi në BE, por…