Zgjidhja e ngërçit në Kuvendin e Kosovës, “kërkohet” ndërhyrja e Osmanit

Kryesuesi i seancës konstituive të Kuvendit të Kosovës, Avni Dehari, thotë se në seancën e nesërme s’ka nevojë për takim konsultativ me partitë parlamentare, raporton KosovaPress.

Dehari, i cili është deputeti më i vjetër i Kuvendit nga radhët e Lëvizjes Vetëvendosje, thekson se emri i kësaj partie për kryeparlamentare vazhdon të jetë deputetja Albulena Haxhiu.

Kuvendi do të mbajë vazhdimin e seancës konstituive të premten në orën 10:00, në përpjekjen e gjashtë për zgjedhjen e trupave të organit më të lartë legjislativ.

Ai rithekson se LVV-ja nuk ka hequr dorë nga emri i Albulena Haxhiut, si e propozuar për kryetare të Kuvendit të Kosovës.

Në lidhje me përfshirjen e presidenten Vjosa Osmani në zgjidhjen e ngërçit në Kuvend, kryesuesi i seancës konstituive thotë se nëse paraqitet nevoja, e para e vendit mund t’i thërrasë për konsultim partitë parlamentare.

Një gjë të tillë e kanë kërkuar edhe shoqëria civile në Kosovë, të cilët për KosovaPress kanë kërkuar nga presidentja t’i thërrasë për konsultim partitë dhe gjetjen e një zgjidhje për konstituimin e Kuvendit të Kosovës, pas zgjedhjeve të 9 shkurtit.

KosovaPress gjatë ditës ka dërguar pyetje edhe në Zyrën e Presidentit në lidhje me ftesën e mundshme që shefja e shtetit mund t’iu dërgojë partive politike për të gjetur një zgjidhje për konstituimin e Kuvendit, por të njëjtit nuk kanë kthyer përgjigje.

Sidoqoftë, presidentja Osmani e ka lënë të hapur këtë mundësi në një letër drejtuar kryesuesit të seancës konstituive më 16 prill, pas dështimit për herë të parë që të votohet verifikimi i mandateve të deputetëve.

LEXONI GJITHASHTU:

• Sorensen flet pas takimit me zv.kryeministrin e Kosovës: Tani do nisem për Beograd
• Kushtetuesja e Kosovës shfuqizon Ligjin për Komisionin e Pavarur të Mediave