Zjarret në Përmet djegin 15 hektarë pyje dhe kullota, kërkohet ndërhyrje nga ajri

Zjarret që kanë përfshirë territorin e bashkisë Përmet gjatë 24 orëve të fundit kanë shkaktuar dëme të konsiderueshme, duke djegur rreth 15 hektarë sipërfaqe me pyje dhe kullota. Situata më problematike është shënuar në fshatin Kutal, ku flakët iu afruan rrezikshëm banesave të zonës.

Menjëherë pas përhapjes së zjarrit, në terren kanë ndërhyrë forcat zjarrfikëse të Përmetit dhe Gjirokastrës, punonjës të shërbimit pyjor, struktura të bashkisë, si dhe një numër i konsiderueshëm vullnetarësh nga komuniteti lokal. Ndërhyrja është mbështetur edhe nga 30 efektivë të Forcave të Armatosura.

Pas orësh të tëra përpjekjesh intensive, flakët u arritën të lokalizohen dhe të izolohen, duke shmangur përhapjen e mëtejshme drejt zonave të banuara. Megjithatë, për shkak të terrenit të vështirë dhe rrezikut të riaktivizimit të vatrave, autoritetet vazhdojnë monitorimin e situatës.

Për shuarjen e plotë të flakëve, institucionet e emergjencës kanë kërkuar ndërhyrje nga ajri, e konsideruar tashmë e domosdoshme për të vënë situatën nën kontroll të plotë.

LEXONI GJITHASHTU:

• Denoncim për gërmime të jashtëligjshme në varret ilire të Selcës, zbulohen tre gropa
• Kriza institucionale në Kosovë, Osmani kërkon interpretim nga Gjykata Kushtetuese