Zjarrfikësi 26-vjeçar rrëfen vështirësitë e profesionit: Kam 4 ditë larg familjes

Olsi Ziso është i riu nga Maliqi që vendosi për t’u bërë zjarrfikës, një punë e vështirë, sidomos në periudhën e verës.

Prej 5 ditësh, 26 vjeçarit i duhet të luftojë me flakët në malin e Bodesë, duke rrezikuar jetën dhe duke qenë larg familjes.

Në një prononcim për Euronews Albania ai deklaroi: “Zjarrfikësi nuk ka kohë, shi, diell e dëborë, ti je në terren. Kemi 4 ditë larg familjes, veprojmë që në orët e para të mëngjesit dhe e mbyllim në orën 8. Japim maksimumin, por terrenet e vështira, era e fortë e bën të pamundur ta vendosesh nënkontroll”.

Por a vlerësohet sot figura e zjarrfikësit?

“Për zjarrfikësit duhet bërë me tepër, me terrene që shkojmë përditë. Presim të ndryshojë akoma. Zjarrfikësja ku ka qenë më parë e ku është sot, është shumë më ndryshe por presim të bëhet akoma më mirë, sepse terrenet e vështira e bëjnë të pamundurën ndërhyrjen e zjarrfikëses”, tha ai.

Kënaqësia që i riu merr është momenti kur ai jep ndihmë për komunitetin.

“Kënaqësia e një zjarrfikësi është nga momenti kur shkon për ndihmë, kur sheh njerëzit në momentin më të vështirë, t’i jep ndihmën e parë, pothuajse i shpëton pasurinë që i digjet”

Olsi është shembulli i të riut i cili zgjedh të qëndrojë në Shqipëri, pavarësisht vështirësive, e aq më tepër, zgjedh të jetë aty kur të tjerët kanë nevojë.

EXONI GJITHASHTU:

• Shkaktoi zjarrin ku u dogjën 1000 ullinj, arrestohet 38-vjeçari (Emri)
• Arrestohet për zjarrvënie 64-vjeçari në Shkodër, ja dëmi që shkaktoi