Zjarrfikësit në Turqi përballen me flakët, evakuohen disa fshatra

Zjarrfikësit në Turqi po përballen për të dytën ditë me radhë me zjarret e fuqishme në provincën perëndimore të Izmirit, ndërsa erërat e forta po përkeqësojnë situatën. Lajmi është bërë i ditur nga Ministri i Pylltarisë, İbrahim Yumaklı, dhe është raportuar nga Reuters.

Sipas autoriteteve, flakët në zonat Kuyucak dhe Doğanbey janë intensifikuar gjatë natës për shkak të erërave që kanë arritur deri në 50 km/orë. Si pasojë, katër fshatra dhe dy rrethe janë evakuuar për të shmangur rrezikun ndaj banorëve.

Ministri Yumaklı konfirmoi se mbi një mijë forca zjarrfikëse janë angazhuar në operacionin e shuarjes, së bashku me helikopterë, avionë zjarrfikës dhe automjete të specializuara.

Pamjet e shpërndara nga mediat lokale tregojnë skena dramatike me tym që ngrihet mbi kodra të mbuluara nga pemë të djegura, ndërsa ekipet përdorin traktorë me rimorkio uji dhe helikopterë për të luftuar flakët nga ajri.

LEXONI GJITHASHTU:

• Lavrov: Rritja e shpenzimeve të NATO-s do të çojë në rënien e aleancës
• Këmbimi valutor: Euro në nivele të ulëta, me sa shiten e blihen monedhat e tjera