Zjarri në shkollën 9-vjeçare, reagon Ministrja e Arsimit: Të ketë hetim të plotë

Ministrja e Arsimit, Evis Kushi ka reaguar në lidhje me zjarrin që përfshiu shkollën 9-vjeçare “5 Shkurti” në Mallakastër.

Përmes një postimi në facebook, Kushi sqaron se nga informacionet paraprake raportohet se zjarri është shkaktuar nga një shkëndijë elektrike.

Megjithatë ministrja e Arsimit kërkon nga policia e Mallakastrës dhe bashkia që të bëjnë një hetim të plotë të shkaqeve që çuan në këtë incident.

“Po ndjekim nga afër me vëmendje zhvillimet në lidhje me ngjarjen e ndodhur në shkollën 9-vjeçare “5 Shkurti” në Mallakastër, ku si pasojë e zjarrit në njërën prej klasave janë shkaktuar dëme fizike dhe materiale.

Sipas informacioneve zyrtare paraprake, shkak i zjarrit ka qenë një shkëndijë elektrike, por megjithatë kërkoj nga organet kompetente, jo vetëm Policia e Mallakastrës por edhe Bashkia, si institucioni përgjegjës për sigurinë e shkollës, që të bëjnë sa më parë një hetim të plotë të shkaqeve që çuan në këtë incident.

Falënderoj veçanërisht punonjësit e zjarrfikëses dhe personelin e shkollës, të cilët kanë ndërhyrë në kohë rekord, duke parandaluar përhapjen e zjarrit në klasat e tjera.

Dëshiroj të informoj opinionin publik se po marrim të gjitha masat, në bashkëpunim me Bashkinë dhe Zyrën Arsimore Mallakastër që shkolla të jetë gati për të pritur nxënësit ditën e enjte, më datë 5 janar, kur rinis procesi mësimor në të gjitha shkollat e vendit”, shkruan Kushi.

LEXO GJITHASHTU:

• Balluku inspekton punimet në Elbasan-Qafë Thanë: Korridorit i 8-të prioritet
• Vrasja e Edmond Papës, gjykata lë në burg Albano Velon, 30-vjeçari mohon akuzat