Zv. kryeministri i RMV, Bytyçi: Ekonomia, sfida e parë e qeverisë

Kuvendi i Maqedonisë së Veriut miratoi të orët e vona të së dielës qeverinë e re me 62 vota pro, 51 kundër dhe asnjë abstenim, pas një debati dyditor. Në krye të ekzekutivit u zgjodh Zoran Zaev, kreu i Lidhjes Social Demokrate të Maqedonisë së Veriut, i cili në zgjedhjet e 15 korrikut fitoi numrin më te lartë të vendeve në Parlament.

Pjesë e qeverisë së re janë LSDM me 11 ministra, 6 nga partia shqiptare BDI, ndërsa partitë BESA dhe Partia Liberal-Demokratike kanë secila nga një post ministror. 8 ministra të kabinetit qeveritar janë shqiptarë. 

Fatmir Bytyçi, i cili do të mbajë pozitën e zv. kryeministrit për çështjet ekonomike, gjatë një interviste për Euronews Albania u shpreh se sfidat e qeverisë janë “ballafaqimi me krizën ekonomike dhe dëmet e COVID-19”.

Z. Bytyçi theksoi se po diskutohet për ofrimin e një pakete të katërt të ndihmës ekonomike pas tri pakove të para që përfshinin një ndihmë prej 550 milionë euro në total.

“Mendojmë se duhet dhe një pako e re ekonomike pasi askush nuk mund të parashikonte këtë pandemi dhe zgjatjen e saj. 140 mijë vende pune që ishin të kërcënuara arritëm ti mbanim. 30 mijë është numri total i vendeve të humbura të punës”, u shpreh zv. kryeministri i RMV-së.

“Të gjithë ata që mbesin pa punë kanë një ndihmë deri sa të kthehen në tregun e punës. Ne i quajmë kërkues aktiv të punës dhe marrin një ndihmë dy deri në katër muaj. Edhe pakoja e katër do të ketë të bëjë me stimulimin e rritjes së konsumit. Do ofrojmë ndihmë për kategori në nevojë dhe sektorët e ekonomisë që janë prekur më shumë gjatë kësaj periudhe”, shtoi z. Bytyçi.

Edhe kryeministri i Maqedonisë së Veriut, Zoran Zaev pas votimit të kabinetit të ri qeveritar tha se, i gjithë fokusi i Qeverisë së re do jetë në ngritjen ekonomike të shtetit, rrugëtimin euroatlantik dhe sundimin e së drejtës, por edhe kultivimin e mirëkuptimit të ndërsjellë mes të gjithë grupeve etnike në shtet. 

Lexoni gjithashtu:

Qeveria e re në RMV, Artan Grupi i BDI-së: Prioritete kyçe janë ekonomia dhe sundimi i ligjit

Parlamenti i RMV-së voton qeverinë e re, Zaev: I gjithë fokusi te ekonomia