Zyra e Shtypit e Selisë së Shenjtë tregon mbi shëndetin e Papa Françeskut

“Gjendja klinike e Atit të Shenjtë konfirmohet të jetë sërish në përmirësim ditën e sotme.

Ai alternoi terapinë e oksigjenit me rrjedhje të lartë me një maskë Ventimask. Për shkak të kompleksitetit të pamjes klinike, nevojiten ditë të tjera të stabilitetit klinik për të sqaruar prognozën.

Në mëngjes Ati i Shenjtë iu nënshtrua fizioterapisë respiratore, duke e alternuar me pushimin. Pasdite, pas një seance shtesë fizioterapie, ai kaloi kohë në lutje në kapelën e banesës së tij private në katin e 10-të, ku mori Eukaristinë. Më pas u angazhua në aktivitete pune”, thuhet në njoftim.

Kjo deklaratë, e dhënë nga zyra e shtypit e Selisë së Shenjtë të enjten në mbrëmje, erdhi ndërsa Papa vazhdon të trajtohet për pneumoni dypalëshe në spitalin Gemelli të Romës. Ai ndodhet në spital që prej datës 14 shkurt, pas një periudhe bronkiti.