Zyrtari i SHBA për projektin e litiumit në Serbi: Mundësi e madhe që nuk vjen shpesh

Nënsekretari i SHBA-së për Rritjen Ekonomike, Energjinë dhe Mjedisin, Jose Fernandez, tha më 10 tetor se projekti “Jadar” është një mundësi e madhe për Serbinë që “nuk shfaqet aq shpesh”.

Fernandez, pas një takimi me presidentin serb Aleksandër Vuçiç në Beograd, tha se hapja e një miniere litiumi në perëndim të Serbisë do të bënte të mundur prodhimin e baterive për mbi një milion automjete elektrike në vit.

“Do t’i shtojë Serbisë një deri në tre për qind të produktit kombëtar bruto, dhe në të njëjtën kohë do të ndihmojë botën në luftën kundër ndryshimeve klimatike. Kjo është një mundësi për Serbinë që të përfitojë nga kjo sfidë brezash. Është një mundësi që nuk vjen aq shpesh”, tha Fernandez.

Zyrtari amerikan theksoi se Shtetet e Bashkuara e mirëpresin diskutimin publik që po mbahet në Serbi për projektin “Jadar” të kompanisë ndërkombëtare “Rio Tinto”.

“Ne do të donim të shohim se si SHBA mund të kontribuojë në atë debat, i cili duhet të bazohet në shkencë dhe fakte”, tha Fernandez.

Ai përkujtoi se Serbia para disa javësh iu bashkua Partneritetit për Sigurinë e Mineraleve dhe se do të punojë së bashku me 14 shtete dhe me Bashkimin Evropian.

“Ne besojmë se investimi në mineralet kritike në mbarë botën duhet të sjellë përfitime për komunitetet dhe të respektojë standardet e larta mjedisore,” tha Fernandez.

LEXONI GJITHASHTU:

• Shefi i Rio Tintos thotë se projekti për litium në Serbi është fushatë dezinformimi
• Vuçeviç zotohet se do të kërkojë garanci të dokumentuara për projektin e litiumit