“Kam katër vjet që s’të kam parë, s’di je e vdekur a je gjallë”, këto vargje janë një thirrje post mortum e Neim Fejzos, për gruan e tij të ndjerë Manushaqen, apo siç e quante ai Shaqen.

Neimi është personazhi i kësaj të shtune në “Real People” ku ka rrëfyer historinë e jetës së tij, përditshmërinë, vuajtjet, por dhe dashurinë. Ai prej 10 vitesh ka humbur shikimin për shkak të tensionit në sy, e megjithatë çdo histori e tregon me qetësi e me buzëqeshje.

Një nga historitë më të veçanta të jetës së tij është historia e dashurisë me Manushaqen.

“Punoja në kooperativë, mes 24 vajzave sytë më shkuan te kjo që jetova 58 vite me të. Gruan e kam pasur shumë më të mirë se vetja nga të gjitha drejtimet. Bashkë bëmë tre fëmijë, dy vajza i kam në Përmet janë martuar e janë me fëmijë, kam e një djalë që ka bërë tre fëmijë”,-tha Neimi.

I pyetur nëse ia ndjen mungesën gruas ai u përgjigj:

“Pasuria më e madhe janë edhe fëmijët, por më e madhe është gruaja, se me atë i qan hallet e jetës. Gruaja ime ka katër vite që më ka vdekur nga kanceri. Kur vajta një herë në varreza i thirra, ‘o Shaqe kam 4 vite që s’të kam parë, je e vdekur a je gjallë, dhe në ëndërr të kam parë, kam ulëritur si i marr, kam ardhur këtu të puth tokën të puth dhenë e të puth varrë, të futem te ty i gjallë”, pas këtyre fjalëve më mori ai shoferi. I shkruaja gjithmonë po do ti tregoj më vonë, se këtu i dëgjojnë të gjithë”, tha Neimi.