10 vitet e Procesit të Berlinit, ulje-ngritjet dhe dualiteti me “Open Balkan”

Procesi i Berlinit u lançua në vitin 2014, si një iniciativë e rëndësishme për të forcuar bashkëpunimin në Ballkanin Perëndimor.

Me iniciativën e ish-kancelares gjermane, Angela Merkel, kjo nismë kishte si qëllim të mbështeste integrimin e vendeve të rajonit në Bashkimin Evropian, duke nxitur projekte të përbashkëta në fusha si infrastruktura, energjia dhe zhvillimi ekonomik.

Takimi i parë në vitin 2014 u zhvillua në një kohë kur presidenti i atëhershëm i Komisionit Evropian, Jean-Claude Juncker, shpalli një pauzë në zgjerimin e BE-së, dhe “procesi i Berlinit” do të trajtonte çështje të rëndësishme si infrastruktura, energjia dhe zhvillimi ekonomik i vendeve të Ballkanit Perëndimor.

Megjithatë, pas disa vitesh, u shfaq nisma “Open Balkan”, që ofroi një alternativë për lëvizjen e lirë të njerëzve dhe mallrave. E promovuar më së shumti kryeministri shqiptar Edi Rama dhe presidenti serb Aleksandër Vuçiç, kjo nismë kishte si qëllim të forconte marrëdhëniet mes tre vendeve: Shqipërisë, Serbisë dhe Maqedonisë së Veriut.

Megjithatë, “Open Balkan” u kritikua nga disa vende të tjera në rajon, që e shihnin si një kërcënim për Procesin e Berlinit. Liderët e Kosovës dhe Malit të Zi shprehën shqetësime se kjo nismë mund të dëmtonte kohezionin rajonal.

Në korrik 2023, kryeministri i Shqipërisë, Edi Rama surprizoi shumëkënd duke shpallur se nisma “Open Ballkan” do të pezullohej, duke theksuar se angazhimi në Procesin e Berlinit ishte prioriteti kryesor. Ky vendim shkaktoi reagime të ndryshme, përfshirë shqetësimin e Vuçiçit, i cili paralajmëroi se “Open Balkan” ishte një ide autonome dhe nuk duhej të ishte nën ndikimin e askujt tjetër.

Në këtë mënyrë, Procesi i Berlinit që prej më shumë se 1 vit është rikthyer si shpresa më e madhe për një vëmendje të shtuar dhe investime të qëndrueshme në këtë pjesë të Europës që ende nuk është pjesë e Unionit.

LEXONI GJITHASHTU:

• Anëtarësimi i Shqipërisë në BE, hapet të mërkurën kapitulli i parë! Zbardhet agjenda
• Zelensky: Koreja e Veriut po dërgon ushtarë dhe armë në Rusi