“21 Janari” reagon kryeministri Rama: Vendimi i GJL ktheu shpresën te shqiptarët

Kryeministri Edi Rama ka reaguart lidhur me vendimin e gjykatës së lartë, e cila vendosi që dosja e “21 janarit” ti kalojë për hetim SPAK-ut.

Ai është shprehur se vendimi i Gjykatës së Lartë ka kthyer shpresë te shqiptarët ndërsa ka shtuar se ai ndihet krenar për kontributin e Partisë Socialiste në krijimin e drejtësisë së re.

“Vendimi i Gjykatës së Lartë sot për kthimin në jetë të dosjes së përgjakur të 21 janarit, ka kthyer në jetë shpresën e varrosur në mendjen e shumë shqiptarëve, se ajo dosje e një krimi të egër shtetëror do të dilte më nga varri i drejtësisë së kalbur shqiptare!

Ky vendim i ka rihapur rrugën e mbyllur kaq shumë vite, syrit së drejtësisë mbi vendin dhe autorët e atij krimi, duke e kthyer vendimin e qartë të Gjykatës Europiane të të drejtave të Njeriut në një mundësi konkrete për drejtësinë e re, që të bëjë histori me vendosjen e një drejtësie të drejtë.

Sot jam më krenar se asnjëherë deri më tash për kontributin unik që Partia Socialiste dha në shembjen e Pallatit të Vjetër të Drejtësisë përmes Reformës në Drejtësi; për durimin në ballafaqimin e vështirë me mllefin legjitim të shumë të zhgënjyerve nga zvarritja e pafundme deri në varrosje e kësaj çështjeje; për moslëkundjen e bindjes se drejtësinë për 21 janarin mund, duhet e do ta bëjë vetëm drejtësia dhe askush tjetër, sado që ajo të vonojë.

Me frymëmarrjen e lehtësuar nga vendimi i sotëm dhe vetëdijen se rruga drejt shpagimit përfundimtar nga drejtësia e gjakut të pafajshëm të katër dëshmorëve të 21 janarit është ende e përpjetë, dua t’u them të gjithë atyre që në këto vite të gjata nuk i kanë kursyer fjalët e hidhura në drejtimin tim e të PS:

Keni të gjithë mirëkuptimin tim, po kurrë mos e humbni besimin tek forca jonë e përbashkët dhe Shqipëria që po bëjmë me përpjekjen tonë të përbashkët”, ka reaguar kryeministri Rama.

LEXONI GJITHASHTU:

• “Ngjyra e zymbylit të kaltër”, promovohet në QKLL libri i Christos Hatzipapas
• Chelsea, revolucion në verë! 15 lojtarë do të largohen, mes tyre edhe Broja