Tre partitë kryesore të qendrës në Austri kanë arritur një marrëveshje për formimin e koalicionit qeverisës, pa përfshirjen e ekstremistëve të djathtë të Partisë së Lirisë, FPO.

Akordi është arritur 5 muaj pasi FPO fitoi zgjedhjet parlamentare të vendit, që është dhe periudha më e gjatë pa qeveri e Austrisë që nga fundi i Luftës së Dytë Botërore.

Përpjekja e parë për të formuar një koalicion qeverisës me të njëjtat parti dështoi në janar, duke bërë që menjëherë më pas detyra për formimin e ekzekutivit t’i kalonte partisë euro-skeptike dhe pro-ruse, FPO, e cila dështoi gjithashtu.

Tani, Partia e Popullit, Social Demokratët dhe Liberalët e Rinj arritën marrëveshjen. Qeveria trepartiake, e para në Austri që nga fundi i viteve ’40, do të marrë detyrën javën e ardhshme.

Duke reaguar, kreu i ekstremistëve Herbert Kickl e cilësoi qeverinë e re si “koalicioni i dështakëve” dhe bëri thirrje për zgjedhje të parakohshme, nisur nga rezultatet e sondazheve që sugjerojnë se partia e tij do të siguronte më shumë se 29 për qind të votave.

Koalicioni i ri do të jetë nën presion për të dhënë rezultate të shpejta në tkurrjen e deficitit buxhetor dhe shmangien e luftërave të brendshme që kanë çuar në rënien e qeverive të mëparshme.

LEXONI GJITHASHTU:

• Vrau 14-vjeçarin dhe plagosi 5 persona, Austria: I dyshuari pjesë e Shtetit Islamik
• Sulm me thikë në Austri: Vritet një 14-vjeçar, plagosen pesë persona