350,000 njerëz të bllokuar në Mariupol

Rreth 350,000 persona kanë mbetur të bllokuar në Mariupol, në jug-lindje të Ukrainës, pa elektricitet, ujë të pijshëm dhe ngrohje.

Ndërsa stoqet me ushqime dhe medikamente janë drejt fundit, situata mund të përkeqësohet, me një krizë urie dhe përhapjen e sëmundjeve.

Mariupoli është i rrethuar nga trupat ruse, që nuk kanë lejuar krijimin e korridoreve humanitare për të shpërndarë ndihma.

Mykola Osychenko, drejtor ekzekutiv i “Mariupol TV”, ishte në qytet në momentin kur Rusia nisi pushtimin në Ukrainë. Ai u largua drejt Zaporizhias, më 15 mars.

Euronews e pyeti se çfarë ka përjetuar ai dhe banorë të tjerë të Mariupolit.

“Njerëzit e moshës time kanë pasur në dispozicion fare pak ushqime dhe ujë, pasi prioritet ishin fëmijët dhe të moshuarit. Një familje u evakuua nga një zonë periferike në shtëpinë tonë në qendër. Zona nga erdhi ajo po përjeton luftimet më të ashpra. Kjo familje qëndroi në bodrum për 5 ditë dhe s’mundi të largohej për shkak të sulmeve që nuk ndaleshin. Ishin bashkëshorti, gruaja dhe fëmija 6-muajsh, që mbijetoi vetëm sepse e ëma arriti ta ushqente me qumësht gjiri”, tha Mykola Osychenko.

Por beteja për evakuimin nuk ka përfunduar.

 “Rreth 2 mijë automjete u larguan më 15 mars. Thuajse çdo makinë kishte një fëmijë të mitur. Njerëzit po merrnin me vete gjënë më të çmuar, më të çmuar se vetë jeta e tyre, ajo e fëmijëve. Të gjitha këto makina po udhëtonin në rrugët e qytetit, ku shpesh herë gjenden trupa të civilëve të vrarë. Këta njerëz po përpiqeshin t’u largonin fëmijëve të tyre vëmendjen nga lufta, vetëm e vetëm që të mos shihnin trupat e vdekur”, u shpreh Osychenko.

Ndërkaq, shkatërrimet në Mariupol shihen kudo.