4 apo 11 maji? Cila datë do të “fitojë”? Presidenti vendos të hënën

Shkallët për në zyrën e presidentit bashkë me propozimin për datën e zgjedhjeve parlamentare dhe kërkesat për një proces të drejtë dhe të lirë i hipën Tedi Blushi, Enkelejd Alibeaj dhe Lulzim Basha.

Nga institucioni që dikur punoi si këshilltar i medias për ish-presidentin Ilir Meta, sot i arrestuar në burg, numri dy i Partisë së Lirisë, Tedi Blushi doli me këtë propozim.

“Është e pranueshme çdo datë përveç datës së caktuar nga Taulant Balla”,-tha Blushi.

Për Enkelejd Alibeaj themelues i partisë së re “Djathtas 1912” , pasi u shkëput nga Lulzim Basha e rëndësishme është që nëse në Tiranë do të mbahet Komuniteti Politik Evropian ai mos të jetë para ditës së zgjedhjeve.

“Në këtë pikë sugjerimi im do të ishte data 4 maj”,-u shpreh Alibeaj.

Bajram Begaj dëgjoi edhe Lulzim Bashën pa një parti politike por që prezantohet si deputet i grupimit të demokratëve euroatlantikë. Edhe pse i ftuar për të propozuar një datë, ai nuk e tha një të tillë.

“E rëndësishme është që shqiptarëve tu garantohet se vota e tyre nuk do të manipulohet”,-tha Basha.

Të hënën bisedat e presidentit do të mbyllen me përfaqësuesit e Partisë Socialiste, Komisionin Qendror të Zgjedhjeve dhe me gjasë me refuzimin e Partisë Demokratike.

Nga takimet e zhvilluara me pjesën më të madhe të politikës, data 4 maj është më e kërkuara nga partitë e vogla si ato parlamentare dhe jo.

LEXONI GJITHASHTU:

• Regjistrimi i votuesve nga jashtë, KQZ lehtëson procedurat për votën e diasporës
• KQZ letër informuese partive politike për votimin e diasporës