Avokati Hoxha: Meta mund të shkojë sërish në SPAK

Avokati Arbër Hoxhaj i ftuar në Euronews Albania, foli në lidhje me paraqitjen e ish-presidentit Ilir Meta, ditën e sotme në SPAK.

Ai theksoi se sot është thirrur në cilësinë e ish-ministrit për çështjen CEZ-DIA, ndërsa nuk përjashtoi mundësinë që mund të thirret sërish.

“Prokuroria e Posaçme po heton se si CEZ dhe DIA kanë lidhur një marrëveshje mes tyre dhe në çfarë  rrethanash e kanë lidhur atë. Meta është thirrur në cilësinë e ish-ministrit. Meta mund të paraqitet një herë, dy herë mund të paraqitet dhe 32 herë por pozicionin procedurial e vendos prokuroria e posaçme. Por për momentin është thirrur për CEZ-DIA”-tha ai.

Kreu i Partisë së Lirisë Ilir Meta është paraqitur mëngjesin e së mërkurës në SPAK.

Para se të hynte brenda ambienteve të Prokurorisë së Posaçme, ai tha për gazetarët se është thirrur për çështjen ÇEZ-DIA.

Dosja Cez -Dia, e regjistruar nga SPAK si një histori e mbartur nga ish prokuroria e krimeve të rënda, i ka ngritur sërish temperaturat pas lirimit të Kastriot Ismailaj, pronari i kompanisë DIA, i cili është larguar në Vjenë pranë familjes që ka marrë azil.