49 sulme kibernetike në një vit, Tafa: 90 % e tyre në sisteme kanë ardhur nga Irani

Gjatë viteve të fundit disa prej institucioneve kryesore të vendit tonë janë goditur nga sulmet kibernetike që paralizuan shërbimet që ata ofrojnë.

70% e incidenteve kibernetike vijnë si pasojë e gabimeve njerëzore.

Autoriteti Kombëtar për Sigurinë Kibernetike me mbështetjen e Departamentit Amerikan të Shtetit organizuan një trajnim ku morën pjesë 2000 nëpunësve të Administratës Publike.

“Ka si qëllim rritjen e ndërgjegjësimit të gjithë punonjësve për tu mbrojtur nga sulmet kibernetike. Kur vjen një email duhet të kenë kujdes, kur vjen një dokument të bashkëngjitur nga persona të paautorizuar ata nuk duhet ta shkarkojnë atë, por duhet të njoftojnë instancat e ekspertëve të sigurisë kibernetike, kur përdorin një USB për të marrë të dhëna duhet të jenë të vetëdijshëm që USB mund të jetë një vector kërcënimi dhe shumë raste të tjera”, tha Igli Tafa, drejtori i Përgjithshëm i Autoritetit Kombëtar për Sigurinë Kibernetike.

Drejtuesi Tafa pohoi se ka pasur një numër të lartë të këtyre sulmeve.

“Kanë qenë 49 sulme kibernetike vitin e shkuar të cilët i përkisnin infrastrukturave të ndryshme. 12 kanë pasur efekte goxha të konsiderueshme.

Në pamje të parë të duket sikur të sulmojnë shtete fqinje ose shtete të cilët ne jemi partner, por kur analizon më thellë kupton që sulmet vijnë kryesisht mbi 90% të rasteve nga shteti i Iranit”, tha më tej Tafa.

Ky trajnim synon të forcojë njohuritë dhe praktikat më të mira të sigurisë kibernetike, duke ofruar një platformë të rëndësishme për diskutim dhe shkëmbim përvojash kryesisht në sektorin public që ka qenë më i riskuar.

LEXONI GJITHASHTU:

• Ambasada kineze në Holandë thotë se Pekini nuk i lejon sulmet kibernetike
• Shqipëria shpallet ekipi më i mirë për t’u përballur me sulmet kibernetike