5 Maji, Dita e Dëshmorëve përkujtohen të rënët e luftës për liri e pavarësi

5 Maji në Shqipëri është dita e përkujtimit të Dëshmorëve të Atdheut. Në të gjitha qytetet e vendit u zhvilluan ceremonitë përkujtimore në ndër të të rënëve të luftës.

Në Durrës pjesëmarrja ishte e reduktuar krahasuar me vitet e mëparshme. Një prej veteranëve e ngriti si shqetësim këtë dukuri, teksa familjarë të veteranëve dhe përfaqësues të institucioneve u mblodhën në Mauzoleumin e qytetit bregdetar.

 “Janë rralluar njerëzit, mentalitetet e njerëzve kanë filluar janë shteruar e rralluar, edhe pjesëmarrja është më e paket, edhe është jo aq shumë revolucionare. Duhet të jetë revolucionare siç ka qenë gjatë luftës edhe më mbrapa. Duhet ta ketë gjithë populli këtë gjë. Rinia duhet të shkelë në gjurmët e partizanëve që kanë rënë dëshmorë, duhet të vijnë të nderojnë dëshmorët çdo 5 maji,” tha Selim Rraça, veteran i luftës

Në varrezat e Dëshmorëve në Vlorë u përkujtuan të rënët e luftës. Ceremonia u shoqërua me vendosjen e buqetave të luleve nga familjarët e të rënëve dhe përfaqësues të institucioneve, si dëshmi nderimi për kontributin e atyre që dhanë jetën për liri. Ata kërkuan që kujtimi I tyre të mos jetë vetëm simbolik.

Edhe në Elbasan u zhvilluan homazhe në Varrezat e Dëshmorëve, në këtë ditë të shënuar, e cila përfaqëson mirënjohjen dhe respektin e përhershëm që populli shqiptar i kushton sakrificës së atyre që luftuan për një të ardhme më të mirë.

Një tjetër qytet që nderoi e përkujtoi dëshmorët e luftës ishte Korça. Të shumtë ishin pjesëmarrësit që vendosën kurora me lule aty ku prehen të rënët e luftës.

Edhe në Berat u përkujtua 5 maji si dita e dëshmorëve të atdheut, ku në memorialin e varrezave morën pjesë familjarët e veteranëve, të cilët theksuan rëndësinë e ruajtjes së vlerave për të cilat dhanë jetën mijëra luftëtarë.

LEXONI GJITHASHTU:

• Dosja “Partizani” shtyhet sërish, vendimi për Berishën do të merret pas 11 majit
• Izraeli zapton gjithë Gazën, çfarë dihet nga plani i kabintetit të Netanyahut