6 të shoqëruar për vrasjen e kenianes, telefoni i saj u hetua në laborator

Mëngjesin e kësaj të shtune me vendim gjykate është ushtruar kontroll në 4 banesa, ndërsa janë marrë në pyetje 6 persona për vdekjen e kenianes, Joy Aoko.

Shoferi i kazinosë Rodi Barçi është mes të shoqëruarve, si një nga personat që kalonte më shumë kohë me 22-vjeçaren, ndërsa në pyetje është marrë dhe i vëllai.

Gazetarja e Euronews Albania, Sara Demushi raportoi se telefoni i kenianes ka qëndruar disa kohë në laborator për të bërë të mundur zbardhjen e ngjarjes. Ndërkaq, janë pyetur dhe shoqet e saj, por dëshmitë kontradiktore nuk kanë dhënë një version të qartë.

Policia ka arritur të sigurojë edhe disa bashkëbisedime që ka pasur 22-vjeçarja me shoferin e kazinosë.

Ende nuk ka një urdhër arresti për personat e shoqëruar.

Joy Aoko u gjet e rrëzuar nga kati i tretë i banesës ku jetonte me qira, pranë vilave gjermane në gusht të vitit 2022.

Ajo shtrua në spitalin e Traumës më datë 14 gusht 2022. 22-vjeçarja i mbijetoi fillimisht plagëve të marra, por një dëmtim në tru e la në gjendje vegjetative. E reja nuk i mbijetoi dot dëmtimeve të marra, duke ndërruar jetë 6 muaj pas ngjarjes së rëndë.

LEXONI GJITHASHTU:

• Vdekja e 22-vjeçares keniane| Policia kontrolle në disa banesa, shoqërohen 6 persona
• VIDEO| “Marshojmë, s’festojmë”, protestë më 8 mars edhe për kenianen