60% e familjeve shqiptare do paguajnë më shtrenjtë energjinë, sipas ekspertit

Abonentët që konsumojnë mbi 700 kilovat-orë në vend, do të kenë rritje të çmimit të energjisë.

E ndërsa kryeministri Edi Rama deklaroi pak ditë më parë se ky grupim përbën 5% të abonentëve, eksperti i ekonomisë Klodian Muço thotë se 60 % e familjeve shqiptare harxhojne mbi 700 kilovat-orë.

“Të konsumosh 700 kilovat orë energjie duke u bazuar tek pagat që u publikuan në dhjetor mendoj se familjet shqiptare të shtresës së mesme do preken”, tha Muço në emisionin Mirmëngjes në Euronews Albania.

Muço është skpetik për përzgjedhjen e këtij pragu.

“Qeveria thotë se konsumi i energjisë për frymë është një tregues mirëqenie, ku në fakt nuk ekziston një studim i tillë. Pse 700 kw/h dhe jo me shume apo me pak?”, tha ai.

Muço thotë se familjet shqiptare shpenzojnë 60% të buxhetit për ushqime dhe energji, ku në BE për këto shpenzojnë rreth 18% të buxhetit.

Për këtë, eksperti thotë se rritja e çmimit të energjisë do të jetë barrë për familjet shqiptare.

Ai tha se edhe nëse rritja e çmimit do të prekte vetëm bizneset, përsëri barra do të binte mbi qytetarët, pasi janë të punësuar në këto biznese, ose janë klientë.

“Efekti do të jetë domino sepse do të preket biznesi, për të perballuar koston do të detyrohet të rrisë çmimet, apo të shkurtojë staf”, u shpreh Muço.

LEXONI GJITHASHTU:

Avrami: Energjia nga TEC-et lundruese kosto më të ulët se importi