BE vë në dispozicion 160 milionë euro për rimëkëmbjen e ekonomisë së Kosovës

Bashkimi Evropian zotohet për vazhdim të mbështetjes financiare për Kosovën në luftën ndaj koronavirusit dhe rimëkëmbjes si pasojë e tij.

Shefja e Zyrës së BE në Prishtinë, Nataliya Apostolova, njoftoi për gatishmërinë e këtij institucioni për të ndihmuar Kosovën deri në 160 milionë Euro për rimëkëmbje ekonomike dhe luftim të varfërisë.

“Sot fola me ministrat Rozeta Hajdari dhe Besnik Bislimi për mbështetjen e mëtejme të Bashkimit Evropian ndaj Kosovës për të luftuar COVID19. Deri në 160 milionë Euro mund të vihen në dispozicion për Kosovën nga BE në dy deri në gjashtë muaj përmes ndihmës mikro-financiare, mbështetjes buxhetore dhe grantet IPA për të mbështetur sektorin privat, bujqësinë dhe zbutur varfërinë”, ka shkruar Apostolova në “Twitter”.