Ndërron jetë 68-vjeçarja me COVID-19, shkon në 24 numri i viktimave

Ka shkuar në 24 numri i viktimave nga COVID-19, pasi një 68-vjeçare nga Tirana ka ndërruar jetë mbrëmjen e së hënës në Spitalin Infektiv. Pacientja ndodhej në gjendje të rëndë pasi trajtohej prej 10 ditësh në shërbimin infektiv e intubuar.

68-vjeçarja e prekur nga COVID19 vuante nga insufencenca renale dhe kishte kryer pesë seanca dialize brenda Spitalit Infektiv gjatë këtyre ditëve. Pavarësisht përpjekjeve maksimale të stafit mjekësor, 68-vjeçarja nuk ja doli të mbijetojë.

Po të hënën ndërroi jetë dhe një 59-vjeçar nga Puka, i cili po ashtu ishte mbartës i coronavirus. Por, Ministria e Shëndetësisë thotë se, pacienti ndodhej  në gjendje kome në spitalin rajonal të Shkodrës, ka ndërruar jetë në spital, si pasojë e hemorragjisë cerebrale (aksident cerebral vascular) dhe jo si pasojë e COVID-19.

Deri më 13 prill, numri i personave të infektuar nga COVID-19 ka shkuar në 467 persona. Në 24 orët e fundit nga testimi i 193 personave, janë zbuluar 21 raste të reja, mes të cilëve një personel shëndetësor dhe dy fëmijë.

Sipas Ministrisë së Shëndetësisë, në orët e fundit janë shëruar 15 pacientë të tjerë, ndërkohë numri totali i të shëruarve ka arritur në 232 persona. Aktualisht në dy spitalet COVID në Shqipëri janë të shtruar dhe po marrim mjekim 52 pacientë.