Drejtori i Transportit Publik në Tiranë: S’do ketë rritje të çmimit të abonesë dhe biletës

Drejtori i Transportit Publik në Tiranë, Enton Punavia deklaroi për Euronews Albania se nuk do të ketë rritje të çmimit të biletës apo abonesë për qytetarët.

Z. Punavia theksoi në studion e “Mirëmëngjes” se sot në linjat e transportit publik ka 50% pasagjerë më pak sesa kishte në situatën para pandemisë.

Ai nëvizoi se së shpejti do të ketë 70% të flotës në qarkullim, derisa të rikthehen kushtet para pandemisë, proces që sipas tij kërkon disa muaj.

Teksa pranoi se operatorët e transportit janë në kushte të vështira, ai tha se për këtë arsye Bashkia e Tiranës ndërmori dy nisma.

“E para ishte drejtimi dhe negocimi me qeverinë për të arritur rimbursimin e TVSH dhe akcizës së karburantit. Për herë të parë rifutet në buxhet një paketë subvencionesh që duhet thënë që ka lidhje me performancën e shërbimit dhe operatorët duhet të kenë një sistem GPS të konfirmuar dhe kontrolluar”, tha ai.

Z. Punavia shtoi se në disa rrugë të Tiranës do të hiqen vendet e parakimit të mjeteve në mënyrë që të mos krijohet trafik.

LEXONI GJITHASHTU:

• Bashkia Tiranë i heq licencën kompanisë që menaxhon linjën e Unazës
• Enton Punavia: Transporti publik u ndikua nga pandemia, heqja e abonesë ishte e domosdoshme