“Nuk ka krizë në RMV”, ministri Bekteshi: Deri në janar qytetarët janë të mbrojtur

Komisioni për krizë elektro-energjetike në Maqedoninë e Veriut në mbledhjen e tij të fundit, nuk e pa të arsyeshme të shpallë gjendjen e krizës.

Sipas drejtuesit të këtij komisioni, ministrit të ekonomisë Kreshnik Bekteshi, të paktën deri në janar qytetarët mund të jenë të qetë se nuk do ti prekë shtrenjtimi ndërsa po mobilizohen kapacitetet shtetërore për prodhimin e energjisë elektrike shtesë.

“Konstatimi i përbashkët ishte se deri në fund të vitit nuk do të ketë rritje të çmimit të energjisë elektrike për amvisëritë, por njëkohësisht edhe për kompanitë e vogla, duke marrë parasysh që një numër i konsiderueshëm i kompanive të vogla tashmë kanë kaluar nga tregu i liberalizuar në furnizuesin universal. E ndjekim situatën me vëmendje, për momentin nuk shpallim krizë energjetike, si qeveri jemi të gatshëm që drejtpërdrejtë të ndihmojmë kompanitë energjetike, përfshirë këtu ESM-në dhe MEPSO-n,” – u shpreh Bekteshi.

Ai beson se edhe po të vijë deri te shtrenjtimi i energjisë elektrike nga janari, shteti do marrë masat e duhura për mbrojtjen e qytetarëve. Mirëpo këtë ndjenjë sigurie të ministrit nuk e ndajnë qytetarët.

Nga ministria e Ekonomisë, mësohet se po bëhen përgatitjet për blerjen e energjisë elektrike nga jashtë. Aktualisht Maqedonia e Veriut harxhon dyfishin e asaj që prodhon.