Policia arreston 6 persona, shisnin mbi 1 milion euro mall pa fatura përmes Facebook dhe Instagram

Policia arrestoi të martën 6 persona të moshës 25-44 vjeç nën dyshimin se tregtonin dhe transportonin produkte me vlerë rreth 1 milionë euro pa paguar detyrime tatimore dhe doganore, duke qenë se nuk i kishin regjistuar bizneset.

Operacioni i koduar “Fast Delivery” erdhi pas konstatimit se shumë prej pakove brenda dhe jashtë Shqipërisër nuk ishin të pajisura me kupon ose faturë tatimore.

“Nga veprimet hetimore të kryera ka rezultuar se mekanizimi i kësaj skeme ushtrohej fizikisht dhe nëpërmjet faqeve online si Instagram dhe Facebook, duke i shkaktuar një dëm të madh shtetit,” njoftoi policia.

6 magazina me një sasi malli të konsiderueshme të dyshuar kontrabandë dhe të papajisura me faturë tatimore, 300 lloje të ndryshme produktesh industriale (si: veshje, parfume, medikamente mjekësore, vegla dhe materiale ndërtimi të cilat kapin një vlerë të konsiderueshme, afërsisht 1 milion euro) dhe shuma monetare të cilat ishin përfituar nga shitja e produkteve, janë sekuestruar në cilësinë e provës materiale nga policia.

Të arrestuarit do të gjykohen për veprat penale “Tregtimi dhe transportimi i mallrave që janë kontrabandë”, ”Ruajtja dhe depozitimi i mallrave kontrabandë”, kryer në bashkëpunim “Fshehja e të ardhurave” dhe “Shkelja e të drejtave të pronësisë industriale”.