Meta reagon pas raportit për lirinë e medias: Qeveria të tërhiqet nga ‘Antishpifja’, e përkeqëson situatën

Presidenti Ilir Meta ka shprehur shqetësimin për regresin e shënuar në lirinë dhe pavarësinë e medias, të pasqyruar në konkluzioneve vjetore të organizatës botërore të gazetarëve “Reporterët pa Kufij”.

Kreu i shtetit e ka cilësuar të papranueshëm përkeqësimin në Indeksin Botëror të Lirisë së Medias, teksa shton se mbështet plotësisht paralajmërimin e “Reporterëve pa kufij” se e ashtuquajtura paketë “anti-shpifje” do ta përkeqësojë më keq situatën në të cilën ndodhet sot media dhe gazetarët në Shqipëri.

Përmes një reagimi të gjatë në faqen e tij në Facebook, president i bën sërish thirrje qeverisë të tërhiqet dhe të rishikojë paketën e ligjeve të miratuara, që siç tërheq vëmendjen organizata botërore e gazetarëve:

– Shkel parimet themelore kushtetuese të një shteti demokratik;
– Shkel të drejtën e lirisë së shprehjes, së shtypit dhe të drejtës së informimit;
– Është në kundërshtim me jurisprudencën e Gjykatës Kushtetuese;
– Shkel standardet e Konventës Evropiane të të Drejtave të Njeriut.

“Liria e të shprehurit është e drejtë themelore e njeriut, shtyllë e pazëvendësueshme për një shoqëri moderne demokratike, dhe tepër jetike për garantimin e llogaridhënies nga të gjitha institucionet publike.

Shqetësimi i ‘Reporterëve pa kufij’ se përdorimi i fatkeqësisë së tërmetit, dhe të pasojave të rënda që ka sjellë pandemia COVID-19 nuk mund të justifikojnë cenimin e lirisë së medias, kërkon reflektim serioz dhe të përgjegjshëm.

Me ketë rast, shpreh mirënjohjen e thellë dhe solidaritetin e plotë për punën e shkëlqyer heroike të mediave, gazetarëve dhe stafeve të tyre mbështetëse nga vija e parë e raportimit, në shërbim të informimit publik, transparencës dhe mbrojtjes së shëndetit të çdo qytetari, si dhe përsëris thirrjen për të mos i braktisur në këto momente tepër të vështira!”, shkruan kreu i shtetit.