Marrëveshja mes Alternativa e LSDM do ta stabilizojë qeverinë, thotë analisti nga RMV

Analisti nga Maqedonia e Veriut, Albert Musliu tha për Euronews Albania se kalimi i partisë Alternativa në mazhorancë është një lëvizje pozitive që pritet ta stabilizojë qeverinë.

Sipas tij, nga partia Alternativa janë të vetëdijshëm për rëndësinë e vendimit të tyre, që mund t’i dëmtojë ose sjellë përfitime në varësi të strategjisë që do të ndjekin.

Z. Musliu u shpreh se justifikimet e partisë shqiptare në vendimin për t’ju bashkuar mazhorancës qëndrojnë, pasi kanë të bëjnë me çështje të ndjeshme për vendin, siç është integrimi europian, situata nga pandemia dhe kriza energjetike evropiane.

“Alternativa ishte në listë të përbashkët me ‘Alternativa për shqiptarët’; lëvizja ndaj tyre nuk është aq korrekte, por ndaj partisë opozitare maqedonase është korrekte. Tani kushtëzimi nga partitë e vogla është më i vogël ndaj shumicës, që mendohet se të ketë 65 deputetë”, tha z. Musliu.