8 Dhjetori, thirrje rinisë për angazhim dhe një shoqëri më aktive

Në kujtesë të ‘revolucionit’ të 8 Dhjetorit, studentë, pedagogë, figura të artit dhe politikës u përfshinë në aktivitetet që u mbajtën në Tiranë.

Të pyetur se a janë të rinjtë aktivë në vendin tonë, ata vetë shprehen se nuk shohin aktivizëm të mjaftueshëm.

“Fatkeqësisht jo”, thotë një i ri.

“Ka potencial për më shumë”, thotë një tjetër.

Kongresi Rinor së bashku me Bashkinë Tiranë prezantuan platformën e Tiranës si Kryeqyteti Evropian i rinisë për vitin 2022. Në vitin 2022 Shqipëria do përfaqësohet në Evropë përmes të rinjve dhe thirrjet e sotme ishin vetëm për ta.

Krerë të lartë institucionalë inkurajuan të rinjtë që të jenë më të zëshëm dhe të përdorin aktivizmin e tyre për të përmirësuar shoqërinë.

“Tirana ka fatin e madh që të ketë ajkën e shoqërisë shqiptare. Shoh një energji të jashtëzakonshme por edhe pikëpyetje”, tha Dafina Peci, drejtoreshë e Kongresit Rinor Kombëtar.

“Jemi shumë pak për t’u përçarë, ky vit i rinisë është për të gjithë edhe për të majtë edhe për të djathtë”, tha Erion Veliaj, kryetar i Bashkisë së Tiranës.

“Në duam të inkurajojmë të rinjtë, veçanërisht ata me më pak mundësi ose me prejardhje të pafavorshme që të bëhen qytetarë aktivë dhe aktorë të ndryshimeve pozitive”, tha  Luigi Soreca, Ambasador i Bashkimit Europian në Tiranë.

“Rinia përballet me sfidat e gjithë shoqërisë. Shoqëria pret nga rinia, po dhe ju prisni nga shoqëria. Ende ka shumë për të bërë”, u shpreh Lindita Nikolla, kryetare e Kuvendit të Shqipërisë.

Gjatë kësaj mbledhie u tha se ashtu siç historia ka treguar në çdo rast, vetëm përmes angazhimit të të rinjve shoqëritë mund të zgjidhin sfidat me të cilat përballen sot.

8 Dhjetori shënon ditën kur në vitin 1990, një grup studentësh e pedagogësh të Universiteteve të Tiranës, u bënë iniciatorë të protestave paqësore që sollën rënien e sistemit komunist dhe i hapën rrugën demokratizimit të Shqipërisë.