Vendimi i qeverisë për të ngrirë çmimet në RMV nuk respektohet, qytetarët ankohen

Vendimi i qeverisë së Maqedonisë së Veriut për të ngrirë çmimet e produkteve të shportës ka nxjerrë në terren inspektoratin e tregut për të kryer kontrolle për çmimet.

Pas disa ditësh inspektim të Inspektoratit të tregut lidhur me atë nëse po respektohet vendimi i qeverisë për ngrirje çmimesh të disa produkteve bazë,  është vërejtur shkelje minimale. Vetëm në një objekt në Manastir, ku ka pasur ngritje çmimesh të disa produkteve, ndërsa në disa objekte nuk kanë mundur të konstatojnë rritje eventuale të çmimeve pasi që kompanitë ose bizneset nuk kanë mbajtur procesverbal  për çmimet e vjetra në mënyrë që të mund të bëhej krahasimi.

Por, pavarësisht se Inspektorati thotë se nuk ka shkelje të dukshme të vendimit, qytetarët nuk janë të kënaqur nga çmimet me të cilat bëjnë pazarin, sidomos në prag të festive të fundvitit.

“Çmimet janë shtrenjtuar, me rrogat që marrim e kemi të vështirë të përballojmë çmimet që vendosin shitësit. Shteti thotë që nuk do të rriten, por kjo nuk është e vërtetë”, u shpreh një qytetar.

“Çmimet janë të larta në përgjithësi, shteti duhet të bëjë diçka sepse janë të papërballueshme”, u shpreh një qytetare.

“Ka rritje ka. Nuk e kam vërejtur saktë nëse ka rritje edhe pas vendimit për ngrirje, por ka çmimet të larta që janë rritur në mënyrë drastike. Ky vendim për ngrirje të çmimeve nuk ndjehet fare. Nuk bën dallim sepse nuk e kemi standardin, duhet përshtatje”, tha një tjetër qytetar.

Nëse dikush kapet duke rritur çmimet e këtyre produkteve, gjobat për mosrespektim të vendimit janë nga 800 deri në 10 mijë euro, në varësi të biznesit.