Shpërblimi për festat, 5000 lekë për pensionistët dhe 3000 lekë për njerëzit në nevojë 

Pensionistët do të marrin 5 mijë lekë shpërblim nga qeveria për festat e fundvitit.

“Janë 668 mijë pensionistë të cilët përfitojnë nga paketa që është miratuar sot që arrin në një vlerë prej 3.5 mld lekësh sa i përket pensionistëve”, u shpreh Delina Ibrahimaj, ministre e Financave dhe Ekonomisë.

Ndër kategoritë që do të përfitojnë janë edhe familjet me ndihmë ekonomike dhe personat me aftësi të kufizuar, të cilët do të marrin 3 mijë lekë shpërblim.

“Janë rreth 72 mijë individë të cilët do të përfitojnë nga shpërblimet e fundvitit. Fondi i vënë në dispozicion për këto kategori është rreth 4 milionë dollarë”, tha Ogerta Manastirliu, ministre e Shëndetësisë.

Vendimet u morën këtë të mërkurë në mbledhjen e qeverisë dhe vlera e bonusit për të gjitha kategoritë shkon në 40 milionë dollarë.