Pagërrjedhja, avokati Bilali: Përveç punonjësve mban përgjegjësi drejtuesi i institucionit nga dolën listat

Avokati Elis Bilali tha për emisionin “Mirëmëngjes” në Euronews Albania se pagërrjedhja ka cenuar rëndë të drejtën e jetës private të çdo individi.

“Numri personal i identifikimit duhet të jetë i fshehtë. Mbrojtja duhet të jepet nga institucionet. Ligji për mbrojtjen e të dhënave personale është në kompetencë të komisionerit, të monitorojë të gjithë procesin marrjes dhe ruajtjes të të dhënave personale”, tha ai.

Avokati nënvizoi se me rastin konkret kemi të bëjmë edhe me konsumim të veprës penale.

Ai theksoi se për pagërrjedhjen mban përgjegjësi edhe drejtuesi i institucionit nga kanë dalë këto të dhëna sensitive.

“Nuk dihet ende se nga kanë dalë këto të dhëna. Ligji i ka dhënë drejtuesit disa kompetenca për ruajtjen e të dhënave personale. Mban përgjegjësi administrative dhe penale drejtuesit i institucionit nga i cili ka rrjedhur informacioni”, u shpreh ai, teksa shtoi se përgjegjësi mbajnë edhe punonjësit e këtij institucioni.

Sipas tij, institucionet shqiptare nuk kanë personel të trajnuar për përpunimin e të dhënave personale.