Rama prezanton nismën Këshillim Kombëtar për Shqipërinë: Do marrim mendimin e qytetarëve

Kryeministri Edi Rama bëri publike mesditën e sotme vendimin e qeverisë për nismën e Këshillimit Kombëtar për Shqipërinë.

Kreu i qeverisë sqaroi se qytetarëve shqiptarë do iu jepet një pyetësor për të marrë mendimin e tyre në lidhje me çështjet e rëndësishme të vendit.

“Në prag të një viti të ri dhe mundësish të reja vjen edhe kjo nismë e re e qeverisë për Këshillimin Kombëtar për Shqipërinë. Me një pyetësor që do ua vëmë në dispozicion të gjithë shqiptarëve, brenda apo jashtë vendit, do i japim jetë një kuvendimi popullor ku do të thithim mendimin e tyre mbi çështje me rëndësi strategjike për vendin, për ekonominë, për shoqërinë tonë”, tha Rama.

“Është më shumë se asnjëherë më parë koha për t’i lënë pas llogoret e sherrit politik dhe për të menduar për gjerat që na bashkojnë përtej gjërat që na ndajmë që të hedhim hapa të rëndësishëm përpara duke u këshilluar së bashku”, u shpreh më tej kreu i qeverisë.

Ai shtoi se disa nga çështjet që do të pyeten qytetarët shqiptarë mund të jenë  “Open Balkan” apo edhe negociatat me BE-në.