Shqipëria, e para në Ballkan për transformimin digjital, sipas raportit të OECD

Krahasuar me vendet e tjera të Ballkanit Perëndimor, Shqipëria u rendit e para për sa i përket transformimit digjital, ofrimit të shërbimeve publike e administrative si dhe mirëqeverisjes në vend.

Shqipëria kishte gjithashtu shifrat më të larta për sa i përket shprehjes së kënaqësisë së qytetarëve, pra përdoruesve të shërbimeve digjitale, krahasuar me vendet e tjera të Ballkanit Perëndimor.

Ky është vlerësimi që ka marrë Shqipëria në raportin e Organizatës për Bashkëpunim dhe Zhvillim Ekonomik OECD/SIGMA i cili u bazua në analizën e bërë mbi performancën për 52 indikatorë në 6 fusha të ndryshme të mirëqeverisjes dhe administrimit publik, në të gjashtë vendet e Ballkanit Perëndimor.

Ky raport u transmetua në Ministerialin Rajonal për Mirëqeverisjen dhe Administrimin Publik, të organizuar nga OECD/SIGMA në 22 shkurt të këtij viti, ku morën pjesë përfaqësuesit e 6 vendeve të Ballkanit Perëndimor, të cilët prezantuan progresin lidhur me këtë reformë.

Shqipëria ka zbatuar disa reforma në fusha të administratës publike vitet e fundit.

Por, në kuadër të ofrimit të shërbimeve publike, arritja më e madhe e Shqipërisë sipas raportit ishte renditja në vendin e parë për transformimin digjital dhe ofrimin e shërbimeve online.

Kalimi i shërbimeve publike nga fizikisht në ato elektronike është një nga pikat që ka marrë vlerësimin më të lartë, përfshi këtu performancën e tyre të deritanishme qysh prej implementimit.

Në pjesën më ta madhe, qytetarët duket se janë të kënaqur dhe e kanë përqafuar digjitalizimin.

Në vazhdim, përdoruesit e shërbimeve publike e administrative në të gjitha vendet e rajonit janë pyetur se sa të kënaqur janë me shërbimet online dhe sa praktike janë ato.

Në këtë kategori, Shqipëria ka shënuar shifrat më të larta, krahasuar me vendet e tjera te Ballkanit Perëndimor.

Pyetjes se “A është e mundur të shkarkoni elektronikisht dokumente personale si certifikata, vërtetime, etj.”, 56% e të anketuarve në Shqipëri i janë përgjigjur pozitivisht dhe se i përdorin rregullisht shërbime të tilla (më shumë se në çdo vend tjetër të Ballkanit).

Sipas raportimeve të qeverisë shqiptare, vitet e fundit, 95% e shërbimeve administrative janë mundësuar online.

377 prej tyre janë të nivelit 4, që në gjuhën e shërbimeve digjitale do të thotë se nisin dhe përfundojnë online.

Sipas raportit, vlera e këtyre shërbimeve elektronike u kuptua sidomos gjatë periudhës së pandemisë, kur kontakti fizik u minimizua në maksimum.

Aktualisht, në sistemin shqiptar të shërbimeve publike administrative online ekzistojnë 55 regjistra elektronikë, të cilët ndërveprojnë ndërmjet tyre në kohë reale, duke bërë që 66% e formularëve për aplikime të ndryshme të plotësohen automatikisht në e-Albania.