Hakohen kanalet ruse për të shfaqur situatën e vërtetë të luftës në Ukrainë

Disa kanale televizive në Rusi janë hakuar dhe përmbajtja e tyre është zëvendësuar me mbulimin e situatës reale të luftës në Ukrainë nga transmetuesit e pavarur nga shteti, Current Time dhe Dozhd.

Këto dy kanale janë bllokuar nga autoritetet në Rusi.

Prapa këtij sulmi besohet të jetë grupi Anonymous, një lëvizje ndërkombëtare aktivistësh dhe hakuesish.

Anonymous është e njohur për sulme të ndryshme kibernetike kundër disa qeverive, institucioneve dhe agjencive qeveritare, korporatave dhe Kishës së Scientology.

Në mesin e kanaleve televizive që janë hakuar janë Wink dhe Ivi – platforma të ngjashme me Netflix – dhe kanalet televizive, Russia 24, Channel One, Moska 24, ka thënë grupi i hakerëve në Twitter.

“Jemi përfshirë në operacionin më të madh të Anonymous. Prandaj jemi të shqetësuar se disa qeveri do të na shohin si kërcënim, apo do të krijojnë skenarë që të na bëjnë të shihemi si të rremë. Ne duam vetëm paqe, jo luftë”, shkruan grupi në Twitter.

The hacking collective #Anonymous hacked into the Russian streaming services Wink and Ivi (like Netflix) and live TV channels Russia 24, Channel One, Moscow 24 to broadcast war footage from Ukraine [today] pic.twitter.com/hzqcXT1xRU

— Anonymous (@YourAnonNews) March 6, 2022

Platformat dhe kanalet televizive tani i janë kthyer transmetimit.

Kjo nuk është hera e parë që mediat ruse janë hakuar që prej momentit kur Putini nisi sulmin në Ukrainë.

Javën e kaluar, Anonymous deklaroi se ka hakuar edhe media tjera si agjencia e lajmeve TASS, Kommersant, Izvestia, Fontanka, Forbes dhe RBK.

Autoritetet ruse kanë rritur presionin ndaj mediave ruse, duke i kërcënuar për mbulimin e luftës në Ukrainë. Putini ka thënë se kush përmend fjalët ‘luftë’ e ‘pushtim’ i Ukrainës në Rusi do të dënohet me 15 vjet burg.

Rregullatori i mediave ruse ka urdhëruar mediat që të publikojnë vetëm informacione nga burime zyrtare.