Shqiptarët jo të interesuar për të pasur përfaqësues në Serbi, thotë politikani

“Populli shqiptar nuk ishte i interesuar për të pasur një përfaqësues në parlamentin serb.” Kështu u shpreh për emisionin “Mirëmëngjes” në “Euronews Albania”, kryetari i Partisë Demokratike Shqiptare në Luginën e Preshevës, Ragmi Mustafa.

“Rezultati i zgjedhjeve për shqiptarët doli ashtu siç donte populli. Populli nuk doli të votojë dhe nuk ishte i interesuar që të delegojë një deputet në Parlamentin e Serbisë, nga secila prej listave shqiptare”, tha Mustafa.

Politikani nënvizoi se në vitin 2020, ka patur më pak shqiptarë në votime dhe u siguruan 3 mandate deputetësh, për shkak se partitë ishin në një koalicion të përbashkët.

“Dy vite më parë, ka pasur shumë më pak shqiptarë që kanë dalë në votime, por gjithsesi u arrit që të fitoheshin 3 mandate”, u shpreh ai.

Mustafa deklaroi se partia e udhëhequr prej tij nuk mori pjesë në këto zgjedhje dhe vendosi të qëndrojë indiferent.

LEXONI GJITHASHTU:

• Ka shpresë për një mandat shqiptar në parlamentin serb, pretendon Shaip Kamberi
• Shaip Kamberi pritet të jetë deputeti i vetëm shqiptar në Parlamentin serb