Obeziteti prek 16% të fëmijëve deri në 5 vjeç, sipas Ministrisë së Shëndetësisë

Vite më parë në Shqipëri të kishe një fëmijë topolak ishte kënaqësi për prindërit.

Tashmë, shëndeti i tepërt është kthyer në një problem. Prindërit i çojnë vetë fëmijët te dietologu.

Nutricionistja Diola Dosti thotë se klientela e saj po shtohet vazhdimisht me të mitur.

“Vijnë 10 fëmijë çdo muaj si klientë”, tha ajo.

Statistikat e Ministrisë së Shëndetësisë tregojnë se 16% e fëmijëve deri në 5 vjeç janë mbipeshë. Me kalimin e viteve shtohet dhe tendenca për të shtuar kilet.

“Parametrat e mëlçisë së një 12-vjeçari janë si ato të një 50-vjeçari alkoolist”, u shpreh ajo.

Krahas problemeve të shëndetit, mbipesha ose obeziteti shpesh shoqërohen me probleme sociale, siç është bullizmi.

Bullizmi për peshën, qoftë ndaj vajzave ashtu dhe ndaj djemve, është më i përhapur në gjimnaz ose vitet e fundit të 9-vjeçares.

Sipas statistikave, tek fëmijët 7-10 vjeç, djemtë kanë më shumë prirje për të qenë mbipeshë ose obezë. Nisur nga kjo prirje ministria arsimit ka shtuar orët e fiskulturës dhe ka ndaluar ushqimet e pashëndetshme në shkolla.

A do të arrijnë këto masa të reduktojnë kilet e tepërta te fëmijët? Këtë do e shohim në vitet në vijim.

LEXONI GJITHASHTU:

• Botohen dy fjalorë shqip për fëmijë