Bombardohet shkolla në lindje të Ukrainës, dyshime për dhjetëra të vdekur

Me dhjetëra persona dyshohet se kanë mbetur të vdekur pasi një bombë goditi një shkollë në lindje të Ukrainës, zonë ku forcat e Ukrainës po luftojnë me trupat ruse dhe separatistët.

Guvernatori i Luhanskut, Serhiy Gaidai ka konfirmuar të paktën dy të vdekur ndërsa 60 të tjera dyshohet se kanë mbetur nën rrënojat e shkollës në Bilohorivka.

Rreth 90 persona ishin strehuar në ndërtesë, ku 30 prej të cilëve janë shpëtuar.

Gaidai thotë se avioni rus lëshoi bombat të shtunën.

Rusia ende nuk ka reaguar për këtë akuzë të tij.

Luhansku është një nga zonat më të nxehta të luftës, ku trupat ruse dhe separatistët luftojnë po tentojnë të rrethojnë forcat qeveritare të Ukrainës.