Rriten rastet me COVID-19 në RMV, izolohen disa funksionarë shtetërorë

Ndërkohë që partitë politikë në Maqedoninë e Veriut po diskutojnë për datën e zgjedhjeve, një valë e re infektimesh më COVID-19 ka pushtuar disa nga komunat e populluara me shumicë shqiptarësh.

Nënkryetari shqiptar i LSDM-së, Muhamed Zeqiri, së bashkë me familjen e tij kanë rezultuar pozitiv. 

Po ashtu një pjesë e funksionarëve të partisë LSDM janë vetëizoluar për shkak të kontakteve me persona që janë bartës. Në vetëizolim janë edhe ministri i Informatikës Damjan Mançevski, si dhe kryetari i komunës së Çairit, Visar Ganiu.

Pikërisht ky i fundit në një intervistë për “Euronews Albania”, tha se, shtimi i numri të të prekurve ka ndodhur për shkak të lehtësimit të masave dhe mund të ketë ardhur dhe nga grumbullimet me rastin e festës së Bajramit.

Ndërsa për rastin e tij, ende nuk ka marrë përgjigje për testin e kryer sot, por është vetëizoluar pasi ka pasur kontakt me një person që ka rezultuar pozitiv.

“Mbrëmë jam mbyllur në shtëpi, kam njoftuar stafin e komunës dhe sipas protokollit të mjekësisë do të respektoj të gjitha rregullat”, tha z. Ganiu.

Për rastet në rritje në Komunën e Çairit, ai nënvizoi se, bëhet fjalë për një zonë me densitet të lartë popullsie pasi në një hapësirë prej 3.4 km katrorë jetojnë 75 mijë banorë, duke shtuar se hyn tek ato zona me numrin më të lartë të banorëve për metër katrorë.